Takvu odluku komentarišu logičnim slijedom razvoja događaja oko reforme izbornog zakonodavstva u režiji DPS-a i DF-a.

„Čelni čovjek Privremenog parlamentarnog odbora za reformu izbornog zakonodavstva najslikovitije može okarakterisati budući rad toga tijela. Čovjek koji je u crnogorskoj javnosti sinonim za kršenje zakona sada će rukovoditi tijelom koje samo u nazivu ima za cilj reformu izbornog zakonodavstva“, naveli su iz pokreta URA.

Ponavljaju da u takvoj predstavi oni neće učestvovati i da je odbor ovakvom odlukom izgubio i minimum kredibiliteta i digniteta.

„Sa onima koji su sinonim devastirane Crne Gore i onima koji svakodnevno čak i na ulici krše zakone države a poslije budu čelni ljudi za reformu izbornog zakona učestvovati nećemo. Ostajemo na svom putu koji je jasan – kompletna reforma izbornog zakonodavstva a ne komedija i rijaliti u skupštinskom odboru koji samo to nagovještava“, zaključuju iz ove partije.