Po prijavi vlasnika butika koji prodaje outlet sportsku garderbu karabinjeri Nove Ligure i Capriata d’Orba su intervenisali i priveli šestoricu crnogorskih mladića koji su bili na maturskoj ekskurziji kroz Italiju.
Kako prenose tamošnji portali, sumnja se da su mladići, od kojih su dvojica maloljetna, iskoristili gužvu u butiku i ukrali robu vrijednu 600 eura.
Oni su uzimali garderobu da probaju i u kabini za presvlačenje nasilno skidali zaštitu od krađe sa odjevnih komada i oblačili ih na sebe, a preko su oblačili svoje stvari. Međutim, radnica je primijetila da nekoliko mladića više puta ulazi i izlazi iz kabine za presvlačenje i to bez garderobe koju su uzeli da probaju i to je prijavila vlasniku, koji je odmah obavijestio policiju.
Karabinjeri su došli i pronašli mladiće, koji su još bili u tržnom centru. Kod njih je prilikom pretresa pronađena ukradena garderoba.
Oni su privedeni, saslušani i kasnije pušteni, nakon što je protiv njih podnijeta krivična prijava za krađu.
Komentari