Nakon održanog sastanka idelegacija i čelnih ljudi dva glavna grada, gradonačelnik Zagreba Milan Bandić ocijenio je kako su istorijski odnosi Zagreba i Podgorice tradicionalno dobri. Pritom je ukazao na Dane Zagreba u Podgorici koji se uspješno održavaju već 14 godina, kao i na dobar status i kvalitetan doprinos crnogorske nacionalne manjine Gradu Zagrebu i u Republici Hrvatskoj.
"Veseli me da odnosi dva glavna grada, Zagreba i Podgorice, kao i država Hrvatske i Crne Gore, idu uzlaznom linijom od onih godina koje se nikada više ne bi trebale ponoviti i iz kojih ćemo izvući pouke", izjavio je Bandić.
Dva grada uspješno sarađuju na području kulture, nauke,ekonomije i turizma, pa je u skladu s tim do jeseni najavljeno potpisivanje protokola o međusobnom razumijevanju i prijateljstvu Podgorice i Zagreba.
Foto: Anadolija
Gradonačelnik Podgorice Ivan Vuković odnose Hrvatske i Crne Gore ocijenio je izvanrednim te naveo kako je to idealan podsticaj da dva glavna grada razviju intenzivnije međusobne odnose i saradnju.
"Planiramo predložiti vladama dvije država ponovno uvođenje direktne avionske linije koja bi povezala Podgoricu i Zagreb. Koristi nam iskustvo Grada Zagreba koje se odnosi na korištenje evropskih fondova za koje smo zainteresovani, kao i komunalne teme te Advent u Zagrebu kojega smo uspješno kopirali ove godine prvi put", izjavio je Vuković.
Najavljeno je kako će zagrebački gradonačelnik Bandić sa delegacijom do ljeta ove godine uzvratno posjetiti Podgoricu, kao i da će sljedeće nedjelje u posjetu zagrebačkom gradonačelniku doputovati gradonačelnik Cetinja.
Sastanku je prisustvovao i ambasador Crne Gore u Republici Hrvatskoj Boro Vučinić.
Delagacija Podgorice u Zagrebu boravi u okviru manifestacije Dani Crne Gore u Zagrebu – Kreativna Crna Gora, koja je započela 5. februara izložbom Udruženja likovnih umjetnika Crne Gore, a brojni privredno-kulturni i promotivno-turistički događaji održavaju se do 13. februara.
Komentari